Shwe Pee Oo

လၢႆမူႇလၢႆၸုမ်းၼႂ်းၵဵင်းမႆႇဢၼ်ၵေႃႇတူဝ်ႁူမ်ႈၵၼ်ၵေႃႇသၢင်ႈ ပဵၼ်ၵေႃႁူမ်ႈသၢင်ႈတူင်ႇဝူင်းၵူၼ်းတႆး ၸတ်းႁဵတ်းပၢင်ၵုမ် ဢၼ်ႁဵၵ်ႈၸိုဝ်ႈဝႃႈ “ပၢင်ၶူၼ်ႉၶႆႈၶိုၼ်းၵၢၼ်ၵေႃႇသၢင်ႈလွင်ႈ ယုမ်ႇယမ်တႃႇငမ်းယဵၼ်လႄႈ ၶၢဝ်းတၢင်းမိူင်းတႆး” ၼႆသေ ဝွၵ်ႇၸိူၼ်းလၢႆမူႇလၢႆၸုမ်း ဢိၵ်ႇၽူႈယႂ်ႇၵူၼ်းလူင်လၢႆၸဝ်ႈ ၶဝ်ႈႁူမ်ႈ ႁႃႈသိပ်းၵေႃႉပၢႆ။ shan meeting ဝၼ်းတီႈ 21/01/2013 ၼႆႉတင်ႈတႄႇဝၢႆးဝၼ်းယၢမ်း 13 မူင်းၼၼ်ႉ ၵေႃႁူမ်ႈသၢင်ႈတူင်ႇဝူင်းၵူၼ်းတႆး ၼႂ်းၵဵင်းမႆႇ လႆႈၸတ်းႁဵတ်း ပၢင်ၶူၼ်ႉၶႆႈၼႄလွင်ႈပၢင်ၵုမ်တႆးတီႈတႃႈၵုင်ႈ ဢၼ်ၸုမ်းၸတ်းၶိုင်ပွင်ပၢင်ၵုမ် တႆးတီႈတႃႈၵုင်ႈလႄႈမီးၸဝ်ႈၶုၼ်ထုၼ်းဢူး ႁူဝ်ပဝ်ႈလူင်ဢိၵ်ႇပႃး ပႃႊတီႊ ၻီႊမွၵ်ႊၶရေႊသီႊၸိူဝ်ႉၶိူဝ်းတႆး ႁူမ်ႈလၢႆၵေႃႉလၢႆၾၢႆႇ ၸတ်းႁဵတ်းပၢင်ၵုမ်ႇဢုပ်ႇဢူဝ်းလွင်ႈ ၵၢၼ်ၵေႃႇသၢင်ႈလွင်ႈယုမ်ႇယမ်တႃႇသၢင်ႈ လွင်ႈငမ်းယဵၼ်ၵႂႃႇတီႈ တႃႈၵုင်ႈ မိူဝ်ႈဝၼ်းတီႈ 26-28/11/2012 ၼၼ်ႉ လႆႈဝွၵ်ႇ ၸိူၼ်းၸုမ်းတႆး လၢႆၸုမ်း ၼႂ်းၵဵင်းမႆႇ ၸိူင်ႉၼင်ႇ ၸုမ်းၵပ်းသၢၼ် လွင်ႈၼၢင်းယိင်းတႆး၊ ၸုမ်းသိင်ႇဝႅတ်ႉလွမ်ႉ၊ ၸုမ်းသိုဝ်ႇႁႅင်းၼုမ်ႇ၊ ၵေႃတႆး ဢိၵ်ႇတင်းၵေႃႁူမ်ႈသၢင်ႈ တူင်ႇဝူင်းၵူၼ်းတႆးၼႂ်းၵဵင်းမႆႇ ႁူမ်ႈလၢႆၵေႃႉၼၼ်ႉ ၶိုၼ်းမႃးၸီႉၸႅင်ႈပိုတ်ႇၶႆႈၼႄလွင်ႈဢၼ်ဢုပ်ႇ လၢတ်ႈၵၼ်ၼႂ်းပၢင်ၵုမ် 26-28/01/2012 မီးၸိူင်ႉႁိုဝ် ပဵၼ်ႁိုဝ် လႂ်ၸိူဝ်းၼၼ်ႉ ဢမ်ႇဝႃႈ ၸုမ်းၸိူဝ်းသူင်ႇတူဝ်တႅၼ်းၵႂႃႇ/ဢမ်ႇၵႂႃႇ။ လိူဝ်သေၵႂႃႇၶဝ်ႈႁူမ်ႈပၢင်ၵုမ်ၼၼ်ႉယဝ်ႉ ၼၢင်းသႅင်ၼွင်ႉ၊ ၼၢင်းထေးထေး၊ ၸၢႆးၶိူဝ်းသႅင်၊ ၼၢင်းၸၢမ်တွင်း၊ ၸၢႆးၸၢႆး၊ ၼၢင်းသႅင်ၸွမ်၊ ၼၢင်းသီလႃး ဢိၵ်ႇပႃးထႅင်ႈ လၢႆၵေႃႉ ယင်းလႆႈသိုပ်ႇၶၢဝ်းတၢင်းၵႂႃႇႁူပ်ႉၵူၼ်းဝၢၼ်ႈ ပွတ်းႁွင်ႇ ပွတ်းၸၢၼ်း ဢုပ်ႇထၢမ်လွင်ႈပဵၼ်ယူႇၵူၼ်းဝၢၼ်ႈ ဢမ်ႇဝႃႈလွင်ႈတုၵ်ႉမႆႈလီၸႃႉ၊ လွင်ႈထုၵ်ႇ တဵၵ်းတဵင်၊ လွင်ႈထုၵ်ႇႁုပ်ႈယိုတ်းဢဝ်တီႈလိၼ် သူၼ်ႁႆႈၼႃး၊ လွင်ႈလွတ်ႇတေႃႇၵႅသ်ႉ လတ်းၽၢၼ်ႇ ႁိမ်းဝၢၼ်ႈႁိမ်းႁိူၼ်း သူၼ်ႁႆႈ တူင်ႈၼႃး ႁူမ်ႈတင်းလွင်ႈထုၵ်ႇၶီႇၼဵၵ်း တဵၵ်းတဵင်လႄႈ ထုၵ်ႇၵၼ်ႉၸၼ်လူလၢႆ လႂ်ၸိူဝ်းၼႆႉ ႁူမ်ႈဝႃႈမီးၵၢၼ်ၵိုတ်းယိုဝ်း ႁဵတ်းလွင်ႈငမ်းယဵၼ်ၵၼ် တင်းၸုမ်းၸိူဝ်းယိပ်း ၵွင်ႈၵၢင်ႇ ၵူၼ်းၶိူဝ်းၼႂ်းမိူင်းႁူမ်ႈတုမ်ယဝ်ႉၵေႃႈ လွင်ႈႁုၵ်းႁၢႆႉၸိူဝ်းၼႆႉယင်းပႆႇၵိုတ်းပႆႇယဵၼ်၊ မၢင်တီႈ မၢင်တွၼ်ႈယင်းတိုၵ်ႉသိုပ်ႇ မီးသိုပ်ႇပဵၼ်လႄႈႁၢႆႉႁႅင်းလိူဝ်ၵဝ်ႇလူးၵွၼ်-ၼႆယဝ်ႉ။ ၵဵဝ်ႇၵပ်းပၼ်ႁႃလွင်ႈၵူၼ်းတႆးပၢႆႈၽေးယွၼ်ႉသိုၵ်းသိူဝ်၊ ယွၼ်ႉထုၵ်ႇယိုတ်းႁႆႈၼႃႈသူၼ်၊ ထုၵ်ႇၽဝ်ဝၢၼ်ႈၽဝ်ၶူင်ႇ၊ ထုၵ်ႇလိုပ်ႈႁေႃႈ ၶၢႆႉပၢႆႈ ယွၼ်ႉၼမ်ႉမိုဝ်းသိုၵ်းမၢၼ်ႈၶီႇၼဵၵ်းတဵၵ်းတဵင်၊ ႁဵတ်းႁၢႆႉႁၢဝ်ႈႁႅင်းမႃးၸွမ်း ၽႅၼ်ၵၢၼ်တႅပ်းသီႇတႅပ်းၶဝ်ၼၼ်ႉသေ ၽဵဝ်ႈမူၺ်ႉၶိူဝ်းၵူၼ်းလႄႈ လႆႈပၢႆႈၼီၶဝ်ႈထင် ယူႇသဝ်းႁဵတ်းၵၢၼ် ၵိၼ်ယူႇၼႂ်းမိူင်းထႆးၼၼ်ႉ ၸၢႆးႁၵ်ႉၶိူဝ်းၵေႃႈ လႆႈပိုတ်ႇလၢတ်ႈ ၼႄ လွင်ႈတၢင်းဢၼ်ၽွင်းတႅၼ်း ပႃႊတီႊ သိူဝ်ၽိူၵ်ႇ ၼၢင်းၶမ်းဢေး လႆႈမႃးႁၼ်တီႈယူႇတီႈသဝ်း တၢင်းတုၵ်ႉတၢင်းယၢၵ်ႈ ၵူၼ်းတႆး ဢၼ်မီးယူႇ ၼႂ်းမိူင်းထႆး၊ လႆႈထၢႆႇႁၢင်ႈမိူဝ်းၵႂႃႇလၢတ်ႈၼႂ်းသၽႃး ပိူဝ်ႈတႃႇလႆႈပွၵ်ႈၶိုၼ်းမိူဝ်းယူႇၼႂ်းမိူင်းတႆးလႄႈလႆႈမီးဝႂ် ၸွမ်းသုၼ်ႇလႆႈၵူၼ်းမိူင်းၶွင်ၸဝ်ႈၵဝ်ႇ၊ လိူဝ်ၼၼ်ႉယင်းလႆႈဢဝ်ဢုပ်ႇၼႄ ၸဝ်ႈဢွင်ႇမျၢတ်ႈ ၸွမ်ၽွင်းလူင်မိူင်းတႆး တီႈၼွၵ်ႈ သၽႃးထႅင်ႈယူႇ။ ဝၢႆးၼၼ်ႉဢႃးၸၢၼ်ၶိုၼ်းသႂ် ၸႂ်ယဵၼ် ၵေႃႈ လႆႈပိုတ်ႇလၢတ်ႈၼႄငဝ်းလၢႆးဢၼ်ပဵၼ်ယူႇယၢမ်းလဵဝ် ဢမ်ႇဝႃႈ ၵၢၼ်သိုၵ်း ၵၢၼ်မိူင်း ႁူမ်ႈတင်း ငဝ်းလၢႆးဢၼ်ၸုမ်းယိပ်းၵွင်ႈၵၢင်ႇၶဝ် တင်း ၾၢႆႇလူင်ပွင်ၸိုင်ႈ တင်းသွင်ၾၢႆႇ တိုၵ်ႉယိုၼ်ႈၶေႃႈဢုပ်ႇဢူဝ်း လၢႆၶေႃႈလၢႆ ႁူဝ်လႄႈတိုၵ်ႉသဵတ်ႈၵႃႈသဵတ်ႈၶၼ်ၵၼ်ယူႇၸိူဝ်းၼႆႉ။ ၸဝ်ႈပိူင်ႇၾႃႉတူဝ်တႅၼ်းတပ်ႉသိုၵ်းၸိုင်ႈတႆးဝၢၼ်ႈႁႆးၵေႃႈ